மறைந்த தேமுதிக தலைவர் விஜயகாந்தின் இரண்டாம் ஆண்டு நினைவு தினத்தை முன்னிட்டு, கோயம்பேட்டில் உள்ள கட்சி அலுவலகத்தில் குருபூஜை மற்றும் அஞ்சலி செலுத்தும் நிகழ்வு நடைபெற்றது. இதில் பல்வேறு அரசியல் கட்சித் தலைவர்களும் பொதுமக்களும் திரளாக வந்து அஞ்சலி செலுத்தினர்.
விஜயகாந்த் மீது கொண்டிருந்த பற்று காரணமாக அன்று முழுவதும் மௌன விரதம் இருந்த அக்கட்சியின் பொதுச்செயலாளர் பிரேமலதா விஜயகாந்த், பின்னர் செய்தியாளர்களைச் சந்தித்தார்.
அப்போது முதல்வர் மு.க.ஸ்டாலின் மற்றும் தமிழக வெற்றிக் கழகத் தலைவர் விஜய் ஆகியோர் நேரில் வராதது குறித்த கேள்விக்கு, அவரவர் சூழ்நிலை காரணமாக வராமல் இருந்திருக்கலாம் என்றும், அதற்காக யாரையும் குறை கூற விரும்பவில்லை என்றும் அவர் முதிர்ச்சியுடன் பதில் அளித்தார்.
விஜயகாந்த் அனைத்துக் கட்சியினராலும் நேசிக்கப்பட்டவர் என்பதைச் சுட்டிக்காட்டிய பிரேமலதா, அவருக்கு அஞ்சலி செலுத்திய அனைவருக்கும் தனது நன்றியைத் தெரிவித்தார். மேலும் தேமுதிகவின் அரசியல் பயணம் குறித்துப் பேசிய அவர், வரும் ஜனவரி மாதம் கூட்டணி குறித்த அதிகாரப்பூர்வ அறிவிப்பு வெளியாகும் என்று கூறினார்.
தொண்டர்களின் விருப்பத்திற்கு இணங்க, மக்களின் நலனை முன்னிறுத்தி ஒரு நல்ல கூட்டணியை தேமுதிக நிச்சயம் அமைக்கும் என்றும் அவர் உறுதியுடன் தெரிவித்தார்.
0 Comments