பாவூர்சத்திரம் ஒளவையார் அரசு மேல்நிலைப்பள்ளிக்கு நுழைவாயில் கேட் அமைக்க வேண்டும் என பள்ளியில் பயிலும் மாணவிகளின் பெற்றோர்கள் கோரிக்கை விடுத்துள்ளனர். தென்காசி மாவட்டம் கீழப்பாவூர் ஒன்றியம் பாவூர்சத்திரத்தில் ஓளவையார் அரசு மகளிர் மேல்நிலைப்பள்ளி உள்ளது. இப் பள்ளியில் 1600-க்கும் மேற்பட்ட மாணவிகள் கல்வி பயின்று வருகின்றனர். மாவட்டத்தில் உள்ள பள்ளிகளில் மாணவிகள் அதிக எண்ணிக்கை கொண்ட பள்ளிகளில் இதுவும் ஒன்று.
இந்த மேல்நிலைப் பள்ளியில் கீழப்பாவூர் ஒன்றியத்தின் பல்வேறு பகுதிகளிலிருந்து மாணவிகள் கல்வி பயின்று வருகின்றனர். இந் நிலையில் நெல்லை - தென்காசி சாலைப் பணிகளுக்கான நில எடுப்பில் பள்ளியின் முன்பகுதி சுற்று சுவர், நுழைவாயில் கோபுரம் மற்றும் கேட் அகற்றப்பட்டு தற்சமயம் மேம்பாலம் மற்றும் சர்வீஸ் சாலை அமைக்கப்பட்டுள்ளது. இப்பள்ளிக்கு தற்சமயம் அரசு சந்தை அருகே ஒரு நுழைவாயிலும் வருவாய் அலுவலகம் அருகே மாணவிகள் செல்வதற்கான வழியும் உள்ளது.
முன்பு பிரதான வாயிலாக இருந்து பகுதி இடிக்கப்பட்டு சுமார் நான்கு ஆண்டுகளுக்கு மேல் ஆகியும் இன்னும் கேட் அமைக்கப்படாததால் திறந்த நிலையில் உள்ளது. இதனால் பள்ளியின் பாதுகாப்பு கருதி துறை சார்ந்த அதிகாரிகள் உரிய நடவடிக்கை எடுக்க வேண்டும் என பள்ளியில் பயிலும் மாணவிகளின் பெற்றோர் மற்றும் சமூக ஆர்வலர்கள் கோரிக்கை விடுத்துள்ளனர்.
0 Comments