தமிழகத்தின் போக்குவரத்து உள்கட்டமைப்பை வலுப்படுத்தும் ஒரு முக்கிய நடவடிக்கையாக, பிரதமர் நரேந்திர மோடி இன்று மார்ச் 11-ந் தேதி திருச்சிராப்பள்ளியில் நடைபெறும் விழாவில் 2 ‘அமிர்த பாரத்’ ரயில்கள் உட்பட மொத்தம் 5 புதிய ரயில் சேவைகளைத் தொடங்கி வைக்கிறார்.
தமிழகத்தின் தொழில் நகரங்களான கோயம்புத்தூர் மற்றும் திருப்பூரில் பணிபுரியும் லட்சக்கணக்கான வெளிமாநிலத் தொழிலாளர்களின் நீண்டகாலக் கனவை நனவாக்கும் வகையில், போத்தனூர் – தன்பாத் அமிர்த பாரத் எக்ஸ்பிரஸ் அறிமுகப்படுத்தப்படுகிறது.
ஜார்க்கண்ட் மாநிலத்தின் நிலக்கரி சுரங்கப் பகுதிகளையும், தென்னிந்தியாவின் நூற்பாலை மையங்களையும் இணைக்கும் இந்த ரயில், வாரந்தோறும் சனிக்கிழமை காலை போத்தனூரில் புறப்பட்டு திங்கள் அதிகாலை தன்பாத் சென்றடையும். நவீன வசதிகள் கொண்ட இந்த ரயிலில் ஏழை மற்றும் நடுத்தர மக்கள் பயன்பெறும் வகையில் குறைந்த கட்டணத்தில் படுக்கை வசதி மற்றும் பொதுப் பெட்டிகள் இணைக்கப்பட்டுள்ளன.
இதேபோல், இந்தியாவின் தென்கோடி முனையான நாகர்கோவிலிருந்து தெலுங்கானா மாநிலத்தின் ஹைதராபாத் (சார்லப்பள்ளி) நகருக்கு நேரடி இணைப்பை வழங்கும் நாகர்கோவில் – சார்லப்பள்ளி அமிர்த பாரத் எக்ஸ்பிரஸ் ரயிலும் தொடங்கி வைக்கப்படுகிறது.
இது தமிழகம், ஆந்திரா மற்றும் தெலங்கானா மாநிலங்களை இணைக்கும் முக்கியப் பாலமாக அமையும்.
*ராமேஸ்வரம் – மங்களூரு
*திருநெல்வேலி – மங்களூரு ஆகிய 2 எக்ஸ்பிரஸ் ரயில்கள் கோயம்புத்தூர் வழியாக இயக்கப்பட உள்ளன. இது தமிழகத்தின் தெற்கு மற்றும் மேற்கு மாவட்ட மக்கள் கர்நாடக கடற்கரை நகரங்களுக்கு எளிதாகச் செல்ல உதவும்.
*காவிரி டெல்டா மாவட்ட மக்களின் நீண்டகாலக் கோரிக்கையை ஏற்று, மயிலாடுதுறை – திருவாரூர் – காரைக்குடி இடையே புதிய பயணிகள் ரயில் சேவையும் தொடங்கப்படுகிறது.
*வேளாண் வணிகத்தில் சிறந்து விளங்கும் பொள்ளாச்சி – பாலக்காடு இடையே நேரடி மின்சார ரயில் சேவையும் இன்று முதல் முதல் நடைமுறைக்கு வருகிறது.
இந்த புதிய ரயில்கள் அனைத்தும் தமிழகத்தின் இரண்டாம் நிலை நகரங்களை நாட்டின் முக்கிய பொருளாதார மையங்களுடன் இணைப்பதன் மூலம் வர்த்தகம் மற்றும் வேலைவாய்ப்பைப் பெருக்கும் என எதிர்பார்க்கப்படுகிறது.
இந்திய இரயில்வேயின் ‘அமிர்த கால’ திட்டத்தின் கீழ் உருவான மிக முக்கியமான மைல்கல்லாக ‘அமிர்த பாரத் எக்ஸ்பிரஸ்’ விளங்குகிறது. சென்னையின் இணைப்பு பெட்டித் தொழிற்சாலையில் ‘இந்தியாவில் தயாரிப்போம் ‘ திட்டத்தின் கீழ் உள்நாட்டிலேயே தயாரிக்கப்படும் இந்த ரயில்கள், நவீன வடிவமைப்பையும் வலிமையான கட்டுமானத்தையும் கொண்டவை. இது வெறும் சொகுசுப் பயணம் மட்டுமன்றி, உழைக்கும் வர்க்கத்தின் கவுரவமான பயணத்தையும் உறுதி செய்கிறது.
0 Comments