மேட்டுப்பாளையம்: வரவிருக்கும் சட்டமன்றத் தேர்தலில் மேட்டுப்பாளையம் தொகுதி அதிமுக வேட்பாளராக அறிவிக்கப்பட்டுள்ள ஓ.கே.சின்னராஜ், இன்று தனது வேட்புமனுவைத் தேர்தல் நடத்தும் அலுவலரிடம் அதிகாரப்பூர்வமாகத் தாக்கல் செய்தார்.
வேட்புமனு தாக்கலுக்கு முன்னதாக, மேட்டுப்பாளையம் அண்ணா சிலைக்கு மாலை அணிவித்து நகரின் முக்கிய வீதிகள் வழியாக அதிமுக தொண்டர்கள் மற்றும் கூட்டணிக் கட்சி நிர்வாகிகளுடன் பிரம்மாண்ட ஊர்வலம் நடைபெற்றது.
செண்டை மேளம் முழங்க, தொண்டர்கள் உற்சாக முழக்கமிட்டு வேட்பாளருக்கு ஆதரவு தெரிவித்தனர். வழிநெடுகிலும் பொதுமக்களிடம் அவர் வாக்கு சேகரித்தார்.
ஊர்வலத்தின் முடிவில், மேட்டுப்பாளையம் வட்டாட்சியர் அலுவலகத்தில் உள்ள தேர்தல் நடத்தும் ஆர்.ஆர்.விஸ்வநாதன் அலுவலரிடம் தனது வேட்புமனுவை ஓ.கே.சின்னராஜ் சமர்ப்பித்தார். அவருடன் மேட்டுப்பாளையம் சட்டமன்ற உறுப்பினர் ஏ.கே.செல்வராஜ்,முன்னால் மாவட்ட கவுன்சிலர் பி.டி.கந்தசாமி, நாசர், கூட்டணி கட்சி நிர்வாகிகள் மற்றும் முக்கிய நிர்வாகிகள் உடனிருந்தனர்.
மனு தாக்கலுக்குப் பிறகு செய்தியாளர்களிடம் பேசிய ஓ.கே.சின்னராஜ் தெரிவித்ததாவது:
"மேட்டுப்பாளையம் தொகுதி மக்களின் நன்மதிப்பைப் பெற்றுள்ள அதிமுக அரசு, மீண்டும் ஒருமுறை வெற்றி பெறும். இத்தொகுதியின் குடிநீர் பிரச்சனை, சாலை வசதிகள் மற்றும் விவசாயிகளின் கோரிக்கைகளை நிறைவேற்றுவதே எனது முதல் கடமை. தொகுதி மக்களின் பேராதரவுடன் அமோக வெற்றி பெறுவேன் என்ற நம்பிக்கை உள்ளது."
மேட்டுப்பாளையம் தொகுதியில் ஏற்கனவே எம்.எல்.ஏ-வாகப் பணியாற்றிய அனுபவம் கொண்ட ஓ.கே.சின்னராஜ், தொகுதி மக்களிடையே நன்கு அறிமுகமானவர் என்பது குறிப்பிடத்தக்கது. தற்போது இவர் மனு தாக்கல் செய்துள்ளதைத் தொடர்ந்து, தேர்தல் களம் இத்தொகுதியில் சூடுபிடிக்கத் தொடங்கியுள்ளது.
0 Comments