ராமநாதபுரம் செய்யது அம்மாள் பொறியியல் கல்லூரியில் முதலாம் ஆண்டு மாணவர்களுக்கான தொடக்க விழா சிறப்பாக நடைபெற்றது. கல்லூரித் தாளாளர் டாக்டர் சின்னதுரை அப்துல்லா தலைமையில் நடைபெற்ற இவ்விழாவில் கல்லூரி முதல்வர், துறைத் தலைவர்கள், பேராசிரியர்கள், முதலாம் ஆண்டு மாணவர்கள் மற்றும் பெற்றோர்கள் கலந்துகொண்டனர்.
விழாவில் கல்லூரி முதல்வர் முனைவர் பெரியசாமி வரவேற்புரை வழங்கி, புதிதாகச் சேர்ந்த மாணவர்களுக்கு வாழ்த்துகளைத் தெரிவித்தார். தொடர்ந்து கல்லூரியின் கல்விச் செயல்பாடுகள், ஆய்வக வசதிகள், வேலைவாய்ப்புப் பயிற்சிகள், மாணவர் நலத்திட்டங்கள் மற்றும் இணைப் பாடத்திட்ட வாய்ப்புகள் குறித்து எடுத்துரைக்கப்பட்டது.கல்லூரித் தாளாளர் டாக்டர் சின்னதுரை அப்துல்லா தலைமை வகித்து பேசியதாவது;
மாணவர்கள் பாட அறிவுடன் தொழில்நுட்பத் திறன், படைப்பாற்றல், தொடர்புத்திறன் மற்றும் தலைமைத்துவப் பண்புகளையும் வளர்த்துக்கொள்ள வேண்டும். பொறியியல் துறையில் தொடர்ந்து ஏற்படும் மாற்றங்களுக்கு ஏற்ப மாணவர்கள் தங்களது அறிவையும் திறன்களையும் மேம்படுத்திக் கொள்ள வேண்டும்.
மேலும், ஒழுக்கம், விடாமுயற்சி, தன்னம்பிக்கை மற்றும் தெளிவான இலக்கு ஆகியவை மாணவர்களின் வெற்றிக்கு அடிப்படையாக அமையும். மாணவர்கள் கல்லூரியில் கிடைக்கும் வாய்ப்புகளை முழுமையாகப் பயன்படுத்தி, சமூகப் பொறுப்புணர்வுள்ள திறமையான பொறியாளர்களாக உருவாக வேண்டும்.இவ்வாறு அவர் பேசினார்.
நிகழ்ச்சியில் முதலாம் ஆண்டு மாணவர்களுக்குக் கல்லூரியின் கல்வி நடைமுறைகள், விதிமுறைகள், நூலகம், ஆய்வகங்கள், மாணவர் ஆதரவு மையங்கள் மற்றும் பல்வேறு துறைகளின் செயல்பாடுகள் அறிமுகப்படுத்தப்பட்டன.இவ்விழா புதிய மாணவர்களின் கல்விப் பயணத்திற்கு உற்சாகமூட்டும் தொடக்கமாக அமைந்தது. பேராசிரியர் நன்றி கூறினார்.
0 Comments