நாகப்பட்டினம் மாவட்டம் திருக்குவளை தாலுக்கா வலிவலத்தில் அமைந்துள்ள ஶ்ரீ மன் ஏகசக்கர நாராயண பெருமாள் திருக்கோவிலில், புரட்டாசி மாதத்தின் மூன்றாவது சனிக்கிழமையை முன்னிட்டு சிறப்பு பூஜை மற்றும் அலங்கார விழா நடைபெற்றது.
புரட்டாசி மாத சனிக்கிழமைகள் வைஷ்ணவர்களுக்கு மிக முக்கியமான திருநாளாகக் கருதப்படுகின்றன. அந்தநாளில் திருமால் வழிபாடு செய்வது புனிதமாகக் கருதப்படுவதால், ஒவ்வொரு ஆண்டும் பக்தர்கள் பெருமளவில் கோவிலுக்கு திரள்கிறார்கள்.
அதன்படி, நேற்று காலை முதலே பக்தர்கள் நீண்ட வரிசையில் திரண்டு ஶ்ரீ மந் ஏக சக்கர நாராயண பெருமாள் திருக்கோவிலில் வழிபாடு மேற்கொண்டனர். கோவில் முழுவதும் துளசி மாலை, செம்பருத்தி, மல்லி, சமந்தி, குருவிந்தா, தாமரை மலர்களால் அழகிய மலர் அலங்காரம் செய்யப்பட்டிருந்தது. திருவுருவத்தில் ஏகசக்கர நாராயண பெருமாள் தங்கவிருட்சம் வடிவில் தோன்றிய காட்சியால் பக்தர்கள் மனம் மகிழ்ந்தனர்.
காலை நேரத்தில் திருப்பள்ளியெழுச்சி, விஷ்ணு சஹஸ்ரநாம பாராயணம், அதன் பின்னர் திருமால் அபிஷேகம் சிறப்பாக நடைபெற்றது. புனித நீர், பால், தயிர், தேன், சந்தனம் மற்றும் பஞ்சாமிர்தம் கொண்டு பெருமாளுக்கு அபிஷேகம் செய்யப்பட்டது. அதன் பின்னர் அலங்கார தீபாராதனை நடைபெற்றது.
அபிஷேகத்திற்குப் பின்னர் பெருமாளுக்கு புதிய பட்டாடை, கிரீடம், நகைகள் அணிவிக்கப்பட்டு, அழகிய துளசி மாலை மற்றும் அர்ச்சனை பூ மாலைகள் சூட்டப்பட்டன. பின்பு நடைபெற்ற மகா தீபாராதனையில் பக்தர்கள் “கோவிந்தா! கோவிந்தா!” என முழக்கமிட்டபடி வழிபட்டனர்.
இந்நிகழ்வில் வலிவலம், மற்றும் சுற்றுவட்டார பகுதிகளிலிருந்து நூற்றுக்கணக்கான பக்தர்கள் குடும்பத்துடன் பங்கேற்றனர். கோவில் வளாகம் முழுவதும் பஜனை குழுக்கள் பக்திப் பாடல்களை பாடி ஆன்மிக சூழலை உருவாக்கின.
மாலை வேளையில் பெருமாளுக்கு பட்டினப்பிரவேசம், பூஜை, சாயரட்சை தீபாராதனை உள்ளிட்ட சடங்குகள் நடைபெற்றன. பின்பு பக்தர்களுக்கு திருப்பிரசாதம் வழங்கப்பட்டது.
திருக்குவளை நிருபர் த.கண்ணன்
0 Comments